"I con tell her say I go fit do dis prostitution, so she abandon me for dere. I dey dere almost two months with di three girls wey we take folo di woman connection.”
Di woman begin threaten her say dem go sell her to take cover her expenses. Las las one man come bail her comot and cari her go Tripoli. Vera tok say dem treat she and the oda gehs like animals. One day gangster kidnap Vera and lock her inside captive with oda women.
"E get where e con reach, dem con dey maltreat us , we no dey eat. Dem dey flog us with smal smal pipe say make we control moni, make we bring moni. Na so everybody dey say we no get moni oo. Na so dem take keep us for dere. We no dey see outside, we no know weda light dey or weda sun dey. We just dey dat room".
After six months inside di hell, anoda man bail her comot and she con begin work for am to pay back. Na for dere Vera begin to look for opportunity to take escape Libya. When some friends offer her say make dem cross di sea togeda, she accept. Di sea joni dey very bad. Di boat dey leak and pipo begin to shout upandan. Den con finally rescue dem and cari dem go Malta. Vera tok say she no go lai lai allow anyone to persuade her to enta dat kind waka ever again.
