"Di aspect of di joni wey difficult pass nai be where dem dey take dey sell woman, because for di joni, you no know who be who. Man wey you dey with fit sell you, man wey you marry wey dey sleep with you fit just make up hin mind because of advice from friends say... ah, dis woman wey you keep for house so, why you no just sell am make you get 4,000 Libyan dinars?”
Dem arrest Franca put for one compound where dem dey beat pipo anyhow and force dem to call deir family and control money come pay for deir ransom. She manage to escape di situation enta boat wey dey go Europe. Di crossing of di sea no easy for Franca at all, sotey she been think say everybody go die. Today she dey tell everybody wey get hear make dem no enta di joni because nobody dey experience something good for dat waka, na so so bitter story.
Nigerian pipo na one kind persin wen be say dem dey strong minded. If you tell dem say make dem no go, dem go tell you say you don go, you dey tell dem say make dem no go. If di joni no good why you no come back? But seeing is believing, but dat time wey you wan take believe so, e be like mercy after death."
