Favor been dey prepare for her wedding for village when problem happun and she need to escape for her life. Her brother kill her stepmother and di family of the stepmother say dem go collet revenge for Favor body. Favor see no oda option dan to escape. Someone been don yarn her before say work dey Libya so she folo enta road. But di waka no be here!
"Di joni no dey easy, we stay for inside desert , nine days, no wota no food". Na so dem dey beat us, weda you be woman o, weda you be man oo. Inside awa bus sef, pipo dey faint"
After dem reach Libya, the smuggler tell her say she go need to work for ashawo house to take pay back di moni for di joni. She las las find work as house geh. Di work been dey difficult and di persin wey she dey work for wicked wella sotey she no even pay her salary. After two years, Libya mata taya Favour so she decide to folo enta sea go Europe.
“Di first day, we spend many hours or ontop of di sea. Naso we dey dere dey cry. Many pipo dey faint for inside, some dey vomit, until awa boat con start to dey leak"
One Libya ship save dem and cari all of dem go prison but dem no put precious for prison because she been get belle for nine months. Later again Precious try to enta boat again but di sea condition get as e be. Las las dem con finally rescue dem cari dem go Malta. Favor tok say she been no wan go anywhere and she say she dey cry even now when she think about the whole mata of how she take lose her wedding. Now, she dey regret everything and she dey advice anybody wey dey naija against the Libya waka because she say pipo dey die like ant for dat joni.