For Precious and Osagie, life for Naija begin to dey somehow when herdsmen begin to dey cari deir cattle go chop Osagie crop for farm. The community begin enta fight with di herdsmen but tension con dey, so di community no dey safe for dem again. Osagie decide say hin go travu go Libya with one friend wen promise to sponsor hin waka. Precious later decide to join, so she meet someone wey promise her house geh work for Libya. The desert joni no easy, na for dere regret begin dey enta their mata.
"We con reach desert wey be say, no mans land, nobody, notin notin. Na der nai we begin dey see grave, fresh grave... all dese ones now still dey go Europe?"
Dem jam dem sef for Libya inside kwanta. Arm robber rob Osagie and as for Precious, na suffer head work she dey battle, no rest or food. She been no get choice but to continue so that she go fit balance di moni wey she owe for di joni. Although dem later dey togeda but the shooting and bombing wey dey happen al di time mean say dem no go ever dey safe for Libya.
“If you lock door, you go still dey fear... because asma boys full everywhere"
Osagie been first no wan risk di deadly joni, but after dem destroy hin neighbor house with bomb, he cari comot for house enta boat. Den dey ontop boat for four days across di sea with no food or wota to even give their baby. Even inside di boat one persin cari knife say e go kill everybody out of frustation. Las las Malta ship rescue dem, even tho dem still dey shock today say dem survive di whole tin.
“Even till today sometime if I remember e go dey make me dey shed tears because I no believe say all dos tins say I go pass am, even for inside di sea"